മലപ്പട്ടം
ഗ്രാമ പഞ്ചായത്ത്

ജാഗ്രത സമിതി

എന്താണ് ജാഗ്രത സമിതി?

സ്ത്രീകളുടെയും കുട്ടികളുടെയും അവകാശങ്ങൾ സംരക്ഷിക്കുന്നതിനും, ശാരീരികവും മാനസികവുമായ സുരക്ഷ ഉറപ്പാക്കുന്നതിനും, അവർക്കെതിരെയുള്ള അതിക്രമങ്ങൾ, അവകാശ ലംഘനങ്ങൾ, വിവേചനം, ചൂഷണം, സാമൂഹ്യവിലക്കുകൾ എന്നിവ തടയുന്നതിനുമായി പ്രാദേശികതലത്തിൽ പ്രവർത്തിക്കുന്ന സംരക്ഷണ വേദിയാണ് ജാഗ്രത സമിതി.

സ്ത്രീകൾക്കും കുട്ടികൾക്കും അടിയന്തര ഇടപെടൽ ആവശ്യമായ സാഹചര്യങ്ങളിൽ സമയബന്ധിതമായി ഇടപെടുകയും ആവശ്യമായ സംരക്ഷണവും സഹായവും ലഭ്യമാക്കുകയും ചെയ്യുക എന്നതാണ് സമിതിയുടെ പ്രധാന ലക്ഷ്യം. മറ്റ് സംവിധാനങ്ങളുടെ അഭാവം മൂലം പരിഹാരം ലഭിക്കാതെ പോകുന്ന പരാതികളും പ്രശ്നങ്ങളും ലഭ്യമായ നിയമപരിരക്ഷകളും സർക്കാർ സംവിധാനങ്ങളും പ്രയോജനപ്പെടുത്തി പരിഹരിക്കുന്നതിനും ജാഗ്രത സമിതി ഇടപെടുന്നു.

ജാഗ്രത സമിതിയുടെ ലക്ഷ്യങ്ങൾ

• സ്ത്രീകളുടെയും കുട്ടികളുടെയും അവകാശങ്ങൾ സംരക്ഷിക്കുകയും അവർക്കെതിരെയുള്ള അതിക്രമം, വിവേചനം, അനീതി, ചൂഷണം, അവകാശനിഷേധം എന്നിവയ്ക്കെതിരെ ശക്തമായ ഇടപെടലുകൾ നടത്തുകയും ചെയ്യുക.

• സ്ത്രീകളും കുട്ടികളും ഉൾപ്പെടുന്ന പരാതികൾ സ്വീകരിച്ച് അടിയന്തര ഇടപെടലുകളിലൂടെയും സഹായ സംവിധാനങ്ങളിലൂടെയും പരിഹാരം കണ്ടെത്തുക.

• പ്രാദേശികതലത്തിൽ പരിഹരിക്കാൻ കഴിയാത്ത പരാതികളും പ്രശ്നങ്ങളും ജില്ലാ ജാഗ്രത സമിതി, വനിതാ കമ്മീഷൻ, സർക്കാർ സംവിധാനങ്ങൾ, നിയമസഹായ ഏജൻസികൾ തുടങ്ങിയ അനുയോജ്യ സംവിധാനങ്ങളിലേക്ക് കൈമാറുകയും തുടർനടപടികൾ ഉറപ്പാക്കുകയും ചെയ്യുക.

• സ്ത്രീകൾക്കും പെൺകുട്ടികൾക്കും ലഭ്യമായ അവകാശ സംരക്ഷണ പദ്ധതികളും സർക്കാർ സംവിധാനങ്ങളും ഏകോപിപ്പിക്കുക.

• സമാന ലക്ഷ്യത്തോടെ പ്രവർത്തിക്കുന്ന വിവിധ സർക്കാർ, സന്നദ്ധ സംഘടനകളുടെയും ഏജൻസികളുടെയും പ്രവർത്തനങ്ങൾ ഏകോപിപ്പിക്കുക.

• സ്ത്രീകൾക്കും കുട്ടികൾക്കും സുരക്ഷിതമായ സാമൂഹിക അന്തരീക്ഷം സൃഷ്ടിക്കുന്നതിനുള്ള പ്രവർത്തനങ്ങൾ സംഘടിപ്പിക്കുക.

• ജനപങ്കാളിത്തം ഉറപ്പാക്കുന്നതിനായി വിവിധ കൂട്ടായ്മകളും ജനകീയ സംവിധാനങ്ങളും പ്രയോജനപ്പെടുത്തുക.

• സ്ത്രീകളുടെയും കുട്ടികളുടെയും ദുരുപയോഗവും ചൂഷണവും തടയുന്നതിനായി സമൂഹത്തിന്റെ നിരീക്ഷണവും പിന്തുണയും ഉറപ്പാക്കുക.

ഗ്രാമപഞ്ചായത്ത് ജാഗ്രത സമിതി

ഘടന

പഞ്ചായത്തുതല ജാഗ്രത സമിതിയിൽ 11 അംഗങ്ങൾ ഉണ്ടായിരിക്കും.

ഭാരവാഹികൾ

അംഗങ്ങൾ

• ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ

• അഭിഭാഷക

• പ്രദേശത്തെ പോലീസ് സ്റ്റേഷൻ ഇൻസ്പെക്ടർ / സബ് ഇൻസ്പെക്ടർ

• എസ്.സി./എസ്.ടി. വിഭാഗത്തിലെ വനിതാ പഞ്ചായത്ത് മെമ്പർ / സാമൂഹിക പ്രവർത്തക

• പ്രാഥമികാരോഗ്യ കേന്ദ്രത്തിലെ മെഡിക്കൽ ഓഫീസർ

• സി.ഡി.എസ്. ചെയർപേഴ്സൺ

• വാർഡുതല ജാഗ്രത സമിതി കൺവീനർമാരിൽ നിന്ന് തിരഞ്ഞെടുക്കപ്പെടുന്ന ഒരാൾ

ക്ഷണിതാക്കൾ

• ജില്ലാ ബാല സംരക്ഷണ സമിതി (DCPU/DCPC) പ്രതിനിധി

• വിദ്യാഭ്യാസ നിർവഹണ ഉദ്യോഗസ്ഥൻ

മലപ്പട്ടം ഗ്രാമപഞ്ചായത്ത് ജാഗ്രത സമിതി അംഗങ്ങൾ

വാർഡ് / ഡിവിഷൻ തല ജാഗ്രത സമിതി

തദ്ദേശഭരണതലത്തിൽ സ്ത്രീകളുടെയും കുട്ടികളുടെയും സംരക്ഷണത്തിനായി രൂപീകരിച്ചിരിക്കുന്ന ജാഗ്രത സമിതിയുടെ പ്രാദേശികതല കീഴ് ഘടകമാണ് വാർഡ് / ഡിവിഷൻ തല ജാഗ്രത സമിതി.

വാർഡുതല സമിതിയുടെ പൊതുയോഗം ഗ്രാമസഭയോടൊപ്പം നടത്തുകയോ, ആവശ്യാനുസരണം പ്രത്യേക യോഗമായി സംഘടിപ്പിക്കുകയോ ചെയ്യാം.

വാർഡ് / ഡിവിഷൻ തല സമിതിയുടെ ഘടന

ഭാരവാഹികൾ

• ചെയർപേഴ്സൺ: വാർഡ് മെമ്പർ / കൗൺസിലർ

• വൈസ് ചെയർപേഴ്സൺ: എ.ഡി.എസ്. പ്രസിഡന്റ് / തിരഞ്ഞെടുക്കപ്പെടുന്ന വനിത

• കൺവീനർ: അങ്കണവാടി വർക്കർ

  • അങ്കണവാടി വർക്കറുടെ അഭാവത്തിൽ സഹായി / മറ്റ് വനിതാ കമ്മ്യൂണിറ്റി വർക്കർ

  • ഉദാ: ആശാ പ്രവർത്തക, എസ്.സി./എസ്.ടി. പ്രമോട്ടർ, പ്രേരക്

• ജോയിന്റ് കൺവീനർ: നിശ്ചയിക്കപ്പെടുന്ന വ്യക്തി

അംഗങ്ങൾ

• പൊതുസമ്മതനായ ഒരാൾ — ഡോക്ടർ, അഭിഭാഷകൻ, വിരമിച്ച ഉദ്യോഗസ്ഥൻ തുടങ്ങിയവർ

• സന്നദ്ധ സംഘടനകളെ പ്രതിനിധീകരിക്കുന്ന ഒരാൾ — ഗ്രന്ഥശാല, ക്ലബ്, സമാജം തുടങ്ങിയവയിൽ നിന്ന്

• പ്രധാന രാഷ്ട്രീയ പാർട്ടികളെ പ്രതിനിധീകരിക്കുന്ന രണ്ട് പേർ, അതിൽ ഒരാൾ വനിതയായിരിക്കണം

• എ.ഡി.എസ്. / സി.ഡി.എസ്. പ്രതിനിധി — ഒരാൾ

എക്സ് ഒഫീഷ്യോ അംഗങ്ങൾ / ക്ഷണിതാക്കൾ

• വാർഡിൽ പ്രവർത്തിക്കുന്ന ആരോഗ്യ പ്രവർത്തകൻ

• വാർഡിലെ സാനിറ്റേഷൻ കമ്മിറ്റി പ്രതിനിധി

• വാർഡിൽ പ്രവർത്തിക്കുന്ന അങ്കണവാടി അധ്യാപിക / കൗൺസിലർ

• വാർഡ് വികസന സമിതി കൺവീനർ

• ബാലസഭ / ബാലസഭാ പ്രസിഡന്റ്

ജാഗ്രത സമിതിയുടെ പ്രാധാന്യം

സ്ത്രീകൾക്കും കുട്ടികൾക്കും നേരിടേണ്ടിവരുന്ന പ്രശ്നങ്ങളിൽ പ്രാദേശികതലത്തിൽ തന്നെ വേഗത്തിലുള്ള ഇടപെടൽ, സംരക്ഷണം, പിന്തുണ, നിയമസഹായ സംവിധാനങ്ങളിലേക്കുള്ള ബന്ധിപ്പിക്കൽ എന്നിവ ഉറപ്പാക്കുന്ന ജനകീയ സംവിധാനമാണ് ജാഗ്രത സമിതി.

സുരക്ഷിതമായ കുടുംബവും സമത്വാധിഷ്ഠിതമായ സമൂഹവും സൃഷ്ടിക്കുന്നതിനായി ജനപങ്കാളിത്തത്തോടെ പ്രവർത്തിക്കുക എന്നതാണ് ജാഗ്രത സമിതിയുടെ ലക്ഷ്യം.